Mgombea urais Zanzibar kutajwa leo hadharani, je atakuwa Dk. Mwinyi?

Halmashauri Kuu ya Chama cha Mapinduzi  Taifa (NEC) leo inatarajia kumtaja mgombea urais Zanzibar kati ya majina matatu yaliyopendekezwa.

Jana Kamati Kuu ya Halmashauri Kuu ya Chama cha Mapinduzi Taifa, ilimaza kikao chake na kupendekeza majina matatu ya wagombea wa urais Zanzibar kwa NEC.

Majina hayo yatawekwa wazi leo katika kikao cha NEC kwa wajumbe kwa ajili ya kupiga kura kumchagua mwanachama mmoja kwa nafasi hiyo ya kugombea urais.

Katika mchakato wa kuchukua fomu walijitokeza wagombea 33 ambapo Kamati Maalum ya Zanzibar  iliyachuja majina hayo na kupata majina matano ambayo yaliwasilishwa kwa Kamati Kuu ya Halmashauri ya Kuu ya CCM (CC).

Akizungumza jana kuhusu kikao cha CC ambacho kilikutana, Katibu wa NEC, Itikadi na Uenezi, Humphrey Polepole, amesema mapendekezo hayatakuwa wazi na kuwataka watu waendelee kuwa watulivu.

Polepole alisema wajumbe hao watatu watatajwa leo kwani Kamati Kuu imewasilisha majina kwa NEC.

Awali katika mchujo wa majina ya wagombea Urais yalibaki majina matano ambayo ni Dk. Hussein Mwinyi, Pereira Silima, Profesa Makame Mbarawa, Dk. Khalid Salum na Khamis Mussa.

source http://www.bongoleo.com/2020/07/10/mgombea-urais-zanzibar-kutajwa-leo-hadharani-je-atakuwa-dk-mwinyi/